illusiones???

Cumo coleutivu, Deprendimientu nun queremos asocianos a una fuercia política concreta, caún de los nuesos miembros tien la so inclinación particular. A móu xeneral, Deprendimientu sofitará a cualaquier fuercia política que trabaye por Asturies dende una perspeutiva nidiamente asturiana ya progresista, seyan les sos siegles les que seyan.

Tres dexar esto nidio, queremos amosar la nuesa costernación ya illusión ente lo que ta asocediendo n'Andecha Astur nestos momentos.

Costernación porque situación tala a 4 meses de les elleciones pon en peligru la presencia normal nes mesmes d'una fuercia asturiana con realidá o posibilidá en dellos conceyos. Costernación pola mala imaxe ya desillusión que pue tresmitir a una parte de la población que por fin entamaba amirar ensin prexuicios pa una opción de salvación p'Asturies.

Illusión, sí, Illusión. Illusión porque pue ser el puntu y'aparte que tantu ñecesita'l nuesu movimientu. Esti puntu y'aparte ha significar la separtación dafechu del movimientu nacionaliegu en 2 partes:

- Per un lláu d'aquellos con deseyos de facer trabayu institucional, aquellos qu'aspiren a glayar na Xunta Xeneral, non a simplemente berrar na cai (pesie a lo importante qu'esto segundu ye). Aquellos que saben qu'Asturies ñecesita un modelu políticu propiu, que nun ha guiase poles realidaes d'otres naciones (Euskadi...)

- Per otru lláu, aquellos cuyes posiciones nun son compatibles con talo oxetivu n'Asturies d'anguaño. Hemos ser coscientes de la situación de ñegación hestórico-identitaria sofrida pol pueblu asturianu nes caberes dómines, ya cumo eso fai imposible qu'el mensax "Independencia ya socialismu" algame'l sofitu ñecesariu d'una masa de población que sintiéndose fonderamente asturiana, entá ven al nacionalismu dende'l miope prisma qu'el sistema "educativu" hespañol ya los Mass Media hespañoles impunxo-yos. Por eso, hai xente (esa llinia dura d'AA que diere "el güelpe", MAF, Bermeyu, Mariu Arbesú...) cuyo trabayu, que nun vamos ñegar, porque'n dellos aspeutos tien sido bien importante, agora mesmu va a la escontra de los intereses d'Asturies, esto ye, algamar qu'una fuercia política braeramente asturiana entre na Xunta.

Creyemos qu'esti puntu de ruptura d'anguaño, pue tornase nunos meses nun puntu de xuntanza ya espoxigue, un puntu que lleve a que xente de prebada ya bultable valía cumo David Rivas, Inaciu Llope, Germán Abad, Faustino Zapico... (ya por qué non, xente del BpA una vegada decátense de la non validez del so trabayu con IU) a ponese a la tiesta d'un proyeutu xunitariu ya abiertu, qu'ensin renunciar a nada, sepa qué coses interesen agora al pueblu asturianu, ya qué coses habrá dexar pal futuru...
Un proyeutu qu'ha llegar a toos esos asturianos qu'a falta d'otra cosa finen por votar con desgana a IU o por dexar el so votu en casa.

Nun importa quién se quede coles siegles nos tribunales, lo qu'importen son les idegues, ya persabemos cuáles son les idegues que puen salvar a Asturies del desainiciu, ya cuáles nestos momentos nun algamarán más nada que la indiferencia o la medrana na mayoría los votantes. Asturies nestos momentos ye lo que ye, ya repetimos, importar modelos ayenos nun ye válidu, ya nun fairá más que aidar al colonialismu hespañol.
Por eses bones idegues, unviamos tol nuesu sofitu a David Rivas, Germán Abad ya demás militantes de l'Andecha Astur que-y interesa a Asturies.

N'Asturies, a 28 díes andaos de Xineru 2007.
A ¿? años de la lliberación. Puxa Asturies Llibre